yandex
Акафист святому Гавриилу грузинскому монаху и Христа ради юродивому
 
 
  Акафист святому Гавриилу грузинскому монаху и Христа ради юродивому







Кондак 1
Монах совершен и юрод Христа ради, ныне во отечестве святыя Нины явился еси, святым монахом древности подобник, и веры извещение на земли живых, и был еси до времене неведом христианом нынешняго века. Ныне же весь мир христианский тебе знает и тебе почитает и c благодарностию вопиет ти: Радуйся, святый Гаврииле, Грузинский чудотворче!


Икос 1
Отрок мудрый и тихий, ты рожден был еси во времена гонений на веру христианскую. Душу твою чистую Бог дарова страждущей Грузии в знамение надежды в советстей нощи. Шествию твоему и свидетельству жития твоего изумляются православнии, тебе поюще:
Радуйся, чадо благочестивое святыя Нины!
Радуйся, светоче Грузии!
Радуйся, Церкве ея возрождение!
Радуйся, заря ея воскресения,
Радуйся, вехо на небесном пути!
Радуйся, верный Господень друже,
Радуйся, святый Гаврииле, Грузинский чудотворче.


Кондак 2
Церкви грузинския оскудеша от верных и порушени быша. Священницы, монахи и монахини умалишася от гонений властей нечестивых. Обаче в сокровенных, во глубине душевней народ православный, святыя Нины чадо духовное, воспеваше Богу всемощную песнь: Аллилуия!


Икос 2
Еще младенец быв, отца лишился еси. Обаче наш Отец небесный прият тя под свой покров и освещаше путь твой от Голгофы, до самых садов воскресения. Изде́тства был еси ты покрыт Его благоутробным милосердием, и мы тебе поем:
Радуйся, древо, насажденное в Эдеме,
Радуйся, имеяй небесное защищение,
Радуйся, юная лета посвятивый Богу,
Радуйся, в вере непрестанно возрастаяй,
Радуйся, сокровище истинное благословения.
Радуйся, образе верным нашего времени,
Радуйся, святый Гаврииле, Грузинский чудотворче.


Кондак 3
Еще отрок сый, играя, возводил еси малыя церкви, спичками их освещая. Мати твоя смущашеся о благочестии твоем, боящеся бо злобы безбожник, стужающих верным. Ты же ́обра́зно гонимую Церковь восставлял еси, поя Богу: Аллилуия.


Икос 3
Шести лет от роду, в школу пришед, всем пример ты был еси и всеми любим, нрава твоего добраго ради. Услышав же о книге Евангелие, обрести возжелал еси и деньги собирал еси. И обрет ту книгу, непрестанно чтяше. Темже дивящеся твоему младому благочестию, поем:
Радуйся, образе о Христе жительства,
Радуйся, Благовестия дарохранительнице,
Радуйся, аналою Священных Писаний,
Радуйся, свече нетварнаго света,
Радуйся, молитвы чистое кадило,
Радуйся, синаксария красная странице,
Радуйся, святый Гаврииле, Грузинский чудотворче!


Кондак 4
Милость имел еси ты велию ко всяцей твари Божией. Возбранял еси мышей убивати, от ловушек спасая их и от дома далече нося. И отрок сый, благоухание Адамово в Раю обрел еси. Птицы сидяху на тебе и пояху, тебе взывающу Богу: Аллилуия.


Икос 4
Чтя Евангелие непрестанно, ты избрал еси в любящем сердце своем жити токмо Христа Бога Нашего ради, и все свое время елика можаше отдал прилежал еси благочестивому чтению Книги Жизни и долзей теплей молитве в храмине пред иконами. Сего ради восхваляем тя, глаголя:
Радуйся, суеты мира сего отвержение,
Радуйся, Владыце всецелое посвящение,
Радуйся, на небеси укоренение.
Радуйся, сердечная молитво непрестанная!
Радуйся, воплощение добродетели!
Радуйся, шествие путем Христовым!
Радуйся, святый Гаврииле, Грузинский чудотворче!


Кондак 5
И во един из дней глас тебе бысть воззрети на небо. И очи возвед и крест великий увидев, уразумел еси, яко той предлежаше тебе носити любве ради Христовы и народа грузинскаго, от гонений страждущаго. И возблагодарив Бога, воспел еси ему: Аллилуия.


Икос 5
В день другий, тебе спящу, внезапу пробуди тя видение беса, ужаснаго обликом, на тебе взирающа, ненависти исполнь. Того не убоялся еси, благодати Божией, покрывающей тя. Бес же тебе удари, укорив, почто боряшеся с ним, и пал еси бездыханен, обаче вера Христова сохрани тя. И от того времене тем паче прилежал еси деланию духовному. И мы тебе вопием:
Радуйся, беса не устрашивыйся,
Радуйся, щитом веры огражденный,
Радуйся, брань не оставивый,
Радуйся, храбросте непобедимая святых,
Радуйся, дерзосте благая исповедников,
Радуйся, дерзновение сынов Божиих.
Радуйся, святый Гаврииле, Грузинский чудотворче.


Кондак 6
Благочестие твое всем известно бысть, и людие к тебе в своих бедах прибегаху. Войне бывшей, прихождаху к тебе весть получити о сродницех воинах. Ты же их молитися наставлял еси и церковь усердно посещати. И тобою уверени быша, всегда бо правду глаголал еси. Темже воспеваху Богу: Аллилуия.


Икос 6
Ты обратил еси иногда дядю Георгия, иже дуб именовася, силы своея ради, прося того тяжкий камень подъяти близ церкве порушенныя святаго Георгия. Той же, потщався, не можаше того сотворити. Ты же, призвав Христа, подъял еси, тому в изумлении бывшу. Тогда обратися той к вере отцев своих, глаголя:
Радуйся, чудес божественных источниче,
Радуйся, своим примером обращаяй.
Радуйся, упование на Христа непреложное,
Радуйся, вера в Его могущество велие,
Радуйся, меж небом и землею сообщение,
Радуйся, Пресвятым Именем чудотворяй.
Радуйся, святый Гаврииле, Грузинский чудотворче.


Кондак 7
Понеже лютая гонения советстии ученицы сатанины чиниша, бояхуся людие у себе иконы хранити. Ты же, посещая тыя не почитавшия, глаголал еси, идеже иконы в доме их обретаются, тем в изумлении бывшим, и просил еси их вверити тебе, обаче вернути обещая, аще пожелают. И тако помогал еси сохранитися множеству икон, поя Богу: Аллилуия.


Икос 7
Двоюнадесяти лету, ты явил еси, яко единаго Христа в житии своем избрал еси. Мати твоя, боящися прещений от властей нечестивых и тебе понуждающи ширший путь избрати, во един из дней верже Евангелие наземь. Ты же, подняв е, покинул еси дом, дабы следовати путем христианским. Удивляющеся твоему избранию, мы зовем ти:
Радуйся, боряйся борением правым,
Радуйся, николиже отступаяй поле брани оставивый!
Радуйся, в избрании твердый!
Радуйся, егоже душа выну на небеси
Радуйся, егоже сердце всегда ко Господу,
Радуйся, егоже помысл всегда о Бозе!
Радуйся, святый Гаврииле, Грузинский чудотворче.


Кондак 8
Идя день и нощь, в Мцхету пришел еси, в монастырь Самтаврийский, игумения же Анусия, с большою любовию тебе принявши, в женстей обители не могущи оставити тя, в Светицховели отправи. Обаче прежде с молитвою представ пред чудотворною иконою Портаитиссы, яже есть Вратарница, благодарил еси, глаголя: Аллилуия.


Икос 8
Немного дней в Светицховели жил еси, обаче оставити тя не можаху, далее в Шио-Мгвим отправился еси, послежде – в Зидазени, идеже малое время тебе скрываху, послежде в Бетани отослаша тя. Тамо жившии два монаха, Георгий и Иоанн, послежде яко святии Церковию прославленнии, отцы твои в вере явишася. По сих един Бог весть, куда ты по Нем последовал еси. И мы тебе поем:
Радуйся в вере стойкое пребывание,
Радуйся, рабе свободный божественныя любве,
Радуйся, совершенный учениче Господень,
Радуйся, искание небеснаго пристанища,
Радуйся, юный друже двух святых,
Радуйся, монах среди терзаний мира,
Радуйся, святый Гаврииле, грузински й чудотворче.


Кондак 9
Егда власти безбожныя, умыслиша землю раскопати, идеже останки воинов грузинских, иже родины свободныя ради погибоша, во ожидании воскресения погребени быша, Ты нощию останки собирая, христианскому погребению, яко подобает, предавал еси, поя: Аллилуия.


Икос 9
Знающе о твоем видении беса, власти вызываху тебе и вопрошаху, и яко безумнаго тебе объявиша. Тогда во дворе матернем ты малое строение возвел еси, и подвиги духовныя продолжил еси. Яко хранитель сионскаго собора ты поставлен был еси, и вскоре во диакона положен быв, и обеты монашеския принес, послежде священство приял еси. Разумеюще достоинство велие сего служения, зовем ти:
Радуйся, егоже благоразумие достиже до Бога
Радуйся, егоже мир объяви яко безумнаго.
Радуйся, егоже безумие божественно бысть.
Радуйся, зерцало верное Евангелия.
Радуйся, чистая луча Другаго Солнца.
Радуйся, отображение горния благодати.
Радуйся, святый Гаврииле, Грузинский чудотворче!


Кондак 10
Во обители Бетанийстей служил еси, егда же закрыта бысть, в Тбилиси возвратился еси и церковь создал еси во дворе дома твоего. Вмале порушена бысть сия, обаче всякий раз без смущения ту возсозидал еси, взывая к Богу: Аллилуиа!


Икос 10
Во един из дней, егда безбожныя власти праздноваху свой советский праздник, ты возжегл еси огромное изображение идольское. Сего ради быв избит нещадно, и токмо милостию Божиею остався жив, объявлен был еси аки безумный. Но мучения терпя, тожде глаголал еси: «Не подобает славе воздаватися сему мертвецу, но единому Христу!» Зряще твое мужество изрядное и веру непогрешимую восхваляем тя сице:
Радуйся, сразивыйся с кровавым змием!
Радуйся, огню предавый того позорное изображение!
Радуйся, сокрушителю суетных идолов!
Радуйся, не убоявыйся смерти!
Радуйся, свидетельствуяй о Христе!
Радуйся, образе мужества о Бозе!
Радуйся, святый Гаврииле, Грузинский чудотворче!


Кондак 11
От того времене приял еси на себе тяжкий подвиг юродства Христа ради. Яко безумнаго вменяху тя, ты же на стогнах проповедаше. Аки пианый притворяяся, тако творяше, якоже вси о Христе юроди, собою являя, яко премудрость мира сего буйство у Бога есть, и яко немудрое Божие премудрее человеков. По сих ты поставлен был во пресвитера во обители Самтавро. И прочее якоже и прежде славил еси Господа, глаголя: Аллилуия!


Икос 11
Осьмнадесят лет ты обходил еси монастыри и церкви, порушенныя от нечестивых, возвещая верным, яко будут вся воссоздана. В обители Шио-Мгвимстей отшельником пребыти хотел еси, обаче, гласом с небесе водим, в Самтавро возвратився, еси. Ттамо в посте и молитве пребывал еси, во время войны братоубийственныя. Всем был еси вся во искушениих, и мы тебе поем:
Радуйся, паломниче неутомимый!
Радуйся, любителю святынь Божиих!
Радуйся, пророче Святыя Церкве!
Радуйся, глашатаю великаго благочестия!
Радуйся, возвестителю Благовестия!
Радуйся, жилище Пресвятаго Духа!
Радуйся, святый Гаврииле, Грузинский чудотворче!


Кондак 12
Чудотворче Христов, ты скрывал еси всегда сей дар Прозорливости божественныя. Обаче никогоже от притекающих к тебе не остави без помощи во искушениих, без подаяния благодати Божия. Проповедаше неустанно любовь и смирение и тыя являше непрестанно во святем житии своем, побуждая нас хвалити Бога, взывающе Ему: Аллилуия.


Икос 12
Последняя лета твоя, со благодушием болезнь принимал еси, и и на одре лежа, наставлял еси, якоже и прежде и упреждая о злых времене́х, хотящих приити. В день же блаженнаго своего отшествия на небо, сказал еси последнее свое наставление, говоря: «Се время моего отшествия приспе». и дланию провед по образу Спасителя, рекл еси: «По тебе иду, Христе, от двоюнадесяти лету. Приими мя». И архиепископу Даниилу чтущу молитвы на исход души, отшел еси и возвратил еси Богу свою кроткую душу. Ангели же и святии воспеваху на небесех:
Радуйся, победносный Христов поборниче!
Радуйся, одолетель в постничестей брани!
Радуйся, сопротив врага защищение!
Радуйся, от Господа увенча́нный!
Радуйся, славо всех юродивых Христа ради!
Радуйся, святый Гаврииле, Грузинский чудотворче!


Кондак 13
От того времене к могиле твоей, яко великия святыни сокровищу, ото всех концев земли вернии притекают поклонитися ти. Елей от лампады твоея яко благотворный бальзам есть, целяй немощи верных и яко живоносный источник многих и многих чудес, являя всеблагое могущество Бога нашего и твою славу, зане верный Его служитель еси изде́тства и до смерти, ныне же поеши Престолу славы Его: Аллилуия, Аллилуия, Аллилуия!

(Этот кондак читается трижды. Затем Икос 1 и Кондак 1)

Молитва святому Гавриилу грузинскому

Отче святый, юродивый Христа ради Гаврииле, ты источал еси в суетном мире Премудрость Божию, предстательствуй о нашем недостоинстве, почитающих память твою святую. Помози нам своими молитвами ко престолу Превышняго Бога, пред Нимже ныне предстоиши, в вере православней отцев наших твердо устояти и путем Божественных заповедей последовати. Да подаст нам образ святаго жития твоего мужество одолевати мирския страсти и хранити молитву на всякое время, яко златницы, в дорогу нам данныя. Да будет нам твое смирение и мужество твое велие во искушениих во ободрение в подвизе жительства христианскаго. Покажи нам светлым своим житием дорогу к вечному спасению и сохрани нас от сетей вражиих. Отче святый, юроде о Христе, Гаврииле, источаяй в мире суетном Премудрость Божию, помолися о нас недостойных, почитающих твою святую память.







Автор акафиста: Иподьякон Клод Лопез-Жинисти
Перевод: Наталия Бахарева
Храм св. Варвары Русской Православной Церкви Московского Патриархата,
Г. Вевей, Швейцария, 2016